രാഷ്ട്രീയരംഗത്തെ കള്ളപ്പണം തുടച്ചുനീക്കാനാണ് ഇലക്ടറല് ബോണ്ട് സംവിധാനം കൊണ്ടുവന്നത്, 20,000 കോടിയുടെ ഇലക്ടറല് ബോണ്ടില് ബിജെപിക്ക് ലഭിച്ചത് ഏകദേശം 6000 കോടിയുടെ ബോണ്ടാണ്. ബാക്കി ബോണ്ടുകള് എവിടേക്ക് പോയി ; ചോദ്യവുമായി അമിത് ഷാ
ഇലക്ടറല് ബോണ്ടിനെ ന്യായീകരിച്ച് കേന്ദ്ര ആഭ്യന്തരമന്ത്രി അമിത് ഷാ. രാഷ്ട്രീയരംഗത്തെ കള്ളപ്പണം തുടച്ചുനീക്കാനാണ് ഇലക്ടറല് ബോണ്ട് സംവിധാനമെന്നും ബോണ്ട് റദ്ദാക്കിയാല് കള്ളപ്പണം തിരിച്ചുവരുമെന്ന് ഭയം ഉണ്ടെന്നും അമിത് ഷാ പ്രതികരിച്ചു. ബോണ്ടുകള് റദ്ദാക്കുന്നതിന് പകരം മെച്ചപ്പെടുത്താമായിരുന്നു. ഇലക്ടറല് ബോണ്ടുകള് സംബന്ധിച്ച സുപ്രീം കോടതി ഉത്തരവ് പൂര്ണ്ണമായി മാനിക്കുന്നുവെന്നും സുപ്രീം കോടതിയുടെ വിധി എല്ലാവരും അംഗീകരിക്കണമെന്നും അമിത് ഷാ പറഞ്ഞു. ആകെയുള്ള 20,000 കോടി ഇലക്ടറല് ബോണ്ടുകളില് ബിജെപിക്ക് ലഭിച്ചത് 6,000 കോടി രൂപ മാത്രമാണെന്നും ബാക്കി ബോണ്ടുകള് എവിടെപ്പോയെന്നും അമിത് ഷാ ചോദിച്ചു.
''ഇന്ത്യന് രാഷ്ട്രീയത്തില് കള്ളപ്പണം ഇല്ലാതാക്കുന്നതിനു വേണ്ടിയാണ് ഇലക്ടറല് ബോണ്ട് അവതരിപ്പിച്ചത്. സുപ്രീംകോടതി ഉത്തരവ് പൂര്ണമായും ഞാന് മാനിക്കുന്നു, എന്നാല് ഇലക്ടറല് ബോണ്ട് പൂര്ണ്ണമായി റദ്ദാക്കുന്നതിനുപകരം മെച്ചപ്പെടുത്തുകയായിരുന്നു വേണ്ടിയിരുന്നത് ''അമിത് ഷാ പറഞ്ഞു. രാഹുല് ഗാന്ധി പറയുന്നത് വലിയ കൊള്ളയാണ് ഇലക്ടറല് ബോണ്ടിലൂടെ നടന്നതെന്നും ബിജെപിക്കാണ് അതിന്റെ നേട്ടം ലഭിച്ചതെന്നുമാണ്. എന്നാല് 20,000 കോടിയുടെ ഇലക്ടറല് ബോണ്ടില് ബിജെപിക്ക് ലഭിച്ചത് ഏകദേശം 6000 കോടിയുടെ ബോണ്ടാണ്. ബാക്കി ബോണ്ടുകള് എവിടേക്കാണ് പോയതെന്ന് അമിത് ഷാ ചോദിച്ചു. തൃണമൂല് കോണ്ഗ്രസിന് 1600 കോടിയും കോണ്ഗ്രസിന് 1400 കോടിയും ബിആര്എസിന് 1200 കോടിയും ബിജെഡിക്ക് 750 കോടിയും ഡിഎംകെയ്ക്ക് 639 കോടിയും കിട്ടിയെന്നും അമിത് ഷാ പറഞ്ഞു.